सुधाकर भालेराव यांनी खासदार होऊन जिल्हा सांभाळावा राज्यमंत्री संजय बनसोडे

सुधाकर भालेराव यांनी खासदार होऊन जिल्हा सांभाळावा

राज्यमंत्री संजय बनसोडे

उदगीर : माजी आमदार सुधाकर भालेराव यांच्या नेतृत्वाची जिल्ह्याला गरज असून त्यांनी राजकीय संन्यास घेण्याचा विचार करू नये, आगामी काळात त्यांनी लोकसभा निवडणूक लढवून खासदार होऊन जिल्हा सांभाळावा असे मत राज्याचे पर्यावरण व पाणीपुरवठा राज्यमंत्री संजय बनसोडे यांनी व्यक्त केले.

उदगीर येथील लाईफकेअर हॉस्पिटल माजी आमदार सुधाकर भालेराव यांच्या कंपनीमार्फत नव्याने सुरू करण्यात आले असून राज्यमंत्री संजय बनसोडे यांच्या उपस्थितीत साई मूर्तीची पूजा करून आज हे हॉस्पिटल आज सुरू करण्यात आले. 

यावेळी बोलताना माजी आमदार सुधाकर भालेराव यांनी आपण गेल्या दहा वर्षांत उदगीरचे लोकप्रतिनिधी म्हणून समाधानकारक केले असून आगामी काळात लाईफ केअर हॉस्पिटलच्या माध्यमातून निस्वार्थ भावनेने जनतेची सेवा करायची आहे. आता आपण राजकारणातुन संन्यास घेणार असल्याचे सांगितले.

भालेराव यांच्या भाषणाचा धागा पकडून बोलताना राज्यमंत्री संजय बनसोडे म्हणाले की, सुधाकर भालेराव यांनी दहा वर्षे उदगीर मतदार संघाचे दमदार नेतृत्व केले आहे. त्यांच्या नेतृत्वाची जिल्ह्याला गरज आहे. पुढील काळात मी उदगीरचे तर भालेराव यांनी जिल्ह्याचे खासदार बनून नेतृत्व करावे, भाजपकडून त्यांना उमेदवारी मिळेलच अन्यथा आघाडीकडून उमेदवारी देण्याचा विचार करू असे सांगण्यासही राज्यमंत्री विसरले नाहीत.

राज्यमंत्री संजय बनसोडे यांनी केलेल्या या विधानामुळे आगामी काळात राजकीय समीकरणं बरीच बदलणार असल्याचे दिसते.